ಪ್ರೀತಿ ಗಣಿ,ನನ್ನರಗಿಣಿ

ಹೃದಯ ಲೇಖನಿ ತುಂಬಾ

ತುಂಬಿರುವೆ ಪ್ರೀತಿ ಶಾಯಿ

ಮನದ ಪುಸ್ತಕದ ಮೇಲೆ

ಗೀಚಿದ್ದು ನಿನ್ನ ಛಾಯೆ

ಎಳೆದ ಪ್ರತಿ ರೇಖೆಯೂ

ನಿನ್ನದೇ ತದ್ರೂಪ

ಬರೆದ ಪ್ರತಿ ಅಕ್ಷರವೂ

ಬಣ್ಣಿಸಿದೆ ಅಪರೂಪ,ಈ ರೂಪ

ಬರೆದಷ್ಟೂ ಉಂಟು,ನಲ್ಮೆಯ ನಂಟು

ಖಾಲಿಯಾಗುವುದಿಲ್ಲ ಲೇಖನಿ

ಬಗೆದಷ್ಟೂ ಸಿಗುವ,ಮೊಗೆದಷ್ಟೂ ಮಿಗುವ

ಪ್ರೀತಿ ತುಂಬಿದ ಗಣಿ

ವರ್ಣನೆಗೆ ಸಿಗದ,ಬಣ್ಣಿಸಲು ಬಾರದ

ಓ ಸೌಂದರ್ಯ ಖನಿ

ಪುಟ ಪುಟವೂ ಈಗ

ಒಂದೊಂದು ಪದ್ಯ

ಕಿರುಕಥೆ ಮಧ್ಯೆ ಮಧ್ಯ

ಖಾಲಿಯಾಗಿದ್ದ ಮನದ

ಮೂಲೆಯನೂ ಆವರಿಸಿದೆ

ನೀನು ದೀರ್ಘಗದ್ಯ

ಮತ್ತು ಇದು ನಿನ್ನಿಂದ ಮಾತ್ರ ಸಾಧ್ಯ

ಪ್ರೀತಿಯಿಂದ

ಪ್ರವಿ

ಎಚ್ಚೆತ್ತುಕೊಳ್ಳೋ ಮೂಡ ಮನುಜ

ಸುತ್ತ ರಣ ಬಿಸಿಲು
ಕಣಕಣವೊ ಸುಡುವಂತೆ
ಕಾಂಕ್ರೀಟ್ ಕಾಡಿನ ನಡುವೆ
ಹಾಯುತಿದ್ದ ಕಿರಣಗಳು
ಲೇಸರ್ ನ ಪಡಿಯಚ್ಚು
ಬಹುಮಹಡಿ ಮುಂದೊಂದು ಬೋನ್ಸಾಯ್
ಹಾಕಿದೆ ಪ್ರಕೃತಿ ರಕ್ಷಣೆಯ ಸೋಗು
ಬಿಸಿಲು ತಡೆಯುವುದೆಲ್ಲಿಂದ
ಬಿದ್ದರೆ ತಾನೇ !!
ಒಂದೇ ಒಂದು ಮರವಿಲ್ಲ
ಬಟ್ಟಾಂಬಯಲಿನಲ್ಲಿ!!!
ಬಿರಿದ ಭೂಮಿ ಆದಷ್ಟು
ಕಿರಣವ ಒಳ ತಳ್ಳುತ್ತಿದೆ !!
ಗರಗಸ ಕೊಡಲಿ ಹಿಡಿದ
ಮರಭಕ್ಷಕರೂ ಹೊರತಲ್ಲ ಸೆಖೆಗೆ
"ಅಯ್ಯಯ್ಯಪ್ಪಾ ಉರಿ ಬಿಸ್ಲು", ಹೇಳುತಿದ್ದ ಮಾತು !!!
ಅದೇ ಮರದ ನೆರಳಲ್ಲಿ ಕುಳಿತು!!
ಹತ್ತಿಪ್ಪತ್ತು ಹನಿ ನೀರಿದ್ದ ಕೆರೆ (!)ಯಲ್ಲಿ
ಮುಖ ನೋಡುತ್ತಾ ಹೇಳುತಿದ್ದ ಸೂರ್ಯ
ಸರ್ವ ಜೀವಕ್ಕೇ ನಾನೇ ಆಧಾರ
ಕೊನೆಯ ಹನಿಯೂ ಆರುತ್ತಿದ್ದಂತೆ
ಕೂಗಿದುವು ಇದ್ದೆರಡು ಮೀನುಗಳು
ಸೂರ್ಯ,ನೀನೊಬ್ಬ ಸುಳ್ಳುಕೋರ
ಬೀಗುತಿದ್ದ ಸೂರ್ಯನೂ ಕುಗ್ಗಿದ
ಆದರೆ ಮನುಜ!!! ಮಜಾ!!
ಸೈಟಿಗಾಯಿತಲ್ಲಾ ಒಂದು ಜಾಗ
ಅಳೆಯುತ್ತಿದಾನೆ ಟೇಪು ಹಿಡಿದು
ಸತ್ತುಬಿದ್ದ ಮೀನನ್ನು ತುಳಿದು!!
ತಲೆಗೊಂದು ಛತ್ರಿ,
ಬಿಸಿಲೇರಿದಂತೆಲ್ಲಾ ಬಿಸ್ಲೇರಿ!
ಬೆಂಕಿ ಬಿದ್ದ ಭೂಮಿ ಹೇಳುತಿತ್ತು
ಇದನೆಲ್ಲಾ ನೋಡಿ...
ಹೂಂ , ವಿನಾಶ ದೂರವಿಲ್ಲ
ಅಳಿ, ಆರಡಿ.. ಮೂರಡಿ..



ಎಚ್ಚೆತ್ತುಕೊಳ್ಳೋ........


ಪ್ರೀತಿಯಿಂದ ಪ್ರವಿ

ಬಾಳ ವ್ಯಾಕರಣ

ಕಡ್ಡಾಯವಾಗಿ ಕನ್ನಡ ವ್ಯಾಕರಣ ಬಲ್ಲವರಿಗೆ ಮಾತ್ರ !!!

ಬಾಲ್ಯ ಒತ್ತಕ್ಷರವಿಲ್ಲದ ಸಾಲು
ಚೂರು ಪಾರು ತಪ್ಪಿದ ಕಾಗುಣಿತ
ಅಡೆ ತಡೆಯಿಲ್ಲದ ಓಟ
ಶಾಲೆ, ಟೀಚರ್ ಗಳ ಕಾಟ
ಸಾಲಿನ ನಡುವೆ ಬರುವ ಕಾಮದಂತೆ,
ಕಾಲೇಜು,ಟೀನೇಜು ಜೊತೆ ಜೊತೆಗೆ
ಓರೆ ಕೋರೆ ನೋಟ ,ಆಡಿದ್ದೇ ಆಟ
ಅರ್ಥ ಕಳೆದುಕೊಂಡಿದೆ ವ್ಯಾಕರಣ
ಮಧ್ಯದಲ್ಲೆಲ್ಲೋ ಅರ್ಧ ವಿರಾಮ!!
ಅದು ಇದು,ಸಿಕ್ಕೀತೋ ಕೆಲಸ
ಕಲಸು ಮೇಲೋಗರ ಈ ಸಮಾಸ
ಹಾಗೂ ಹೀಗೂ ಮದುವೆಯ ಸುಳಿ ಮಧ್ಯ ನಾವು
ಸಪ್ತಪದಿ,ತ್ರಿಪದಿ,ಷಟ್ಪದಿ
ವಾರ್ಧಕ, ಅವಳೋ ಭಾಮಿನಿ
ಒಂದು ಲಘು, ಎರಡು ಗುರು !!!
ಹೂಂ ಈಗ ಸಂಧಿಕಾಲ !!
ಲೋಪವೇ ಹೆಚ್ಚು ,ಅಲ್ಲಲ್ಲಿ ಆದೇಶ
ಬಿಡಲಾಗುವುದೇ ಯಣ್ ಸಂಧಿ
ಪೂರ್ಣಕಾಮ,ಸವರ್ಣದೀರ್ಘ!!
ನೋಡ ನೋಡುತ್ತಲೇ ಆಗಮನ
ಬಂತದೋ ಕಂದ ಪದ್ಯ !!
ಯಮಾತಾರಾಜಭಾನಸಲಗಂ
ಇದು ಸಂಸಾರ ಗಣ
ಲಲಿತ ಸಾಹಿತ್ಯ,ಅಲ್ಲೊಮ್ಮೆ ಇಲ್ಲೊಮ್ಮೆ ರಗಳೆ
ತಲುಪಿ ಬಿಟ್ಟೆವಲ್ಲಾ ಕೊನೆಯ ಅಧ್ಯಾಯ
ಅಪಾರವಾದ ಅರ್ಥ,ಒಮ್ಮೊಮ್ಮೆ ಅಪಾರ್ಥ
ವ್ಯಾಕರಣ ಅಷ್ಟಕ್ಕಷ್ಟೇ.....
ಒತ್ತಕ್ಷ್ರರ,ಸಂಧಿ,ಷಟ್ಪದಿ,ರಗಳೆ,ಛಂದಸ್ಸು
ಯಾವುದೋ... ಎಲ್ಲಾ ತಮಸ್ಸು!!
ಯಮನೂ ಪಾಲಿಸುವ ನಿಯಮ
ವಾಕ್ಯದ ಕೊನೆಗೆ ಪೂರ್ಣ ವಿರಾಮ !!!

ಇತಿ ಶ್ರೀ !!!!

ಪ್ರೀತಿಯಿಂದ ಪ್ರವಿ

ಸಾವಿನತ್ತ

ನವ್ಯ ಶೈಲಿಯಲ್ಲೊಂದು ಕವನ ..



almost ಯಾರೂ ಸುಳಿಯದ
ಹಾದಿಯ ಬದಿಯ ಮರ ನಾನು
ಏಕಾಂಗಿ,ಸುತ್ತ ಬರೀ ಬೋಳುಗುಡ್ಡ
ಜೊತೆಯಿರುವುದು ಒಂದೆರಡು ಎಲೆ
ನಾಲ್ಕೈದು ಟೊಂಗೆ ,ಕುಟುಕು ಜೀವ
ಶಿಶಿರದ ಹಂಗಿಲ್ಲ ವಸಂತದ ಗುಂಗಿಲ್ಲ !!
ಬೇರುಗಳು ನೀರನ್ನರಸುತ್ತ ಹೊರಟಿವೆ
ಆದರೆ ಅವೂ ನನ್ನಷ್ಟೆ ದುರ್ಬಲ
ತಲುಪಲಾರವೇನೋ ಜಲ
ಬಿರು ಬಿಸಿಲು,ನನ್ನ ಬುಡಕ್ಕೇ ನೆರಳಿಲ್ಲ
ಬೇರೆಯವರಿಗೆ ದೂರದ ಮಾತು !!
ನೀರೆರೆಯುವರನ್ನಂತೂ ನಾ ಕಾಣೆ
ಆಗೊಮ್ಮೆ ಈಗೊಮ್ಮೆ ನಾಯಿ ಕಾಲೆತ್ತಿದ್ದಷ್ಟೆ!!
ಅಪರೂಪಕ್ಕೆ ಮನುಷ್ಯರೂ !!
ಆದರೂ ಏನೋ ಆಸೆ
ಒಂದೆರಡು ಹನಿ ಮಳೆ ಬರಬಹುದು
ಬೇರುಗಳು ಎಲ್ಲಾದರೂ ಜಲ ಸೇರಿಯಾವು...
ಮೋಡವೇ ಇಲ್ಲದ ಬಾನಿನಲ್ಲಿ
ಸೂರ್ಯ ಕಿಸಕ್ಕನೇ ನಕ್ಕಿದ್ದ,ನಗುತ್ತಲೇ ಇದ್ದಾನೆ
ಜೀವವೇ ಇಲ್ಲದ ಬೇರುಗಳು ಸಾಯಲು
ರೆಡಿಯಾಗಿದ್ದವು ನನ್ನಂತೆ !!
ಅಮರನಲ್ಲ ನಾನು ಮರ !!!

ಪ್ರೀತಿಯಿಂದ ಪ್ರವಿ

ಪ್ರೀತಿಮುತ್ತು !!!

ಬಿಸಿಲಲಿ ಬೆಂದಿಹ ಭೂಮಿಗೆ

ಮಳೆಹನಿ ಸೋಕಿದೆ

ವಿರಹದಿ ತಪಿಸಿದ ಹೃದಯಕೆ

ಪ್ರೀತಿಯು ಸಿಕ್ಕಿದೆ

ನೀರನು ಹೀರಿದ ಭುವಿಯು

ನಳನಳಿಸಿ ನಲಿಯುತಿದೆ

ಹೃದಯದಿ ಹೊಕ್ಕಿಹ ಪ್ರೀತಿ

ಹಿತವಾಗಿ ಹರಿಯುತಿದೆ

ಚಿಪ್ಪಲಿ ಸೇರಿದ ಹನಿಯು

ಮುತ್ತಾಗಿ ಮೆರೆಯುತಿದೆ

ಎದೆಯಲಿ ಬಿದ್ದ ಪ್ರೀತಿ ಹನಿಯು

ಮೆತ್ತಗೆ ಮುತ್ತಾಗುತಿದೆ

ಮುತ್ತದೋ ಮಿನುಗುತಿದೆ

ಹೃದಯವು ಹೊಳೆಯುತಿದೆ!!!

=== ಪ್ರೀತಿಯ ಪ್ರವಿ

ಅಮ್ಮ ನಿನ್ನ ತೋಳಿನಲ್ಲಿ!!

ಅಮ್ಮ ನಿನ್ನ ಮಡಿಲಲ್ಲಿ
ಮತ್ತೊಮ್ಮೆ ಮಗುವಾಗಿ
ಮಲಗೋ ಆಸೆ
ನಾ ನಕ್ಕು ನಿನ್ನ ಮುಖದಲ್ಲೂ
ನಗುವನ್ನು ನೋಡೋ ಆಸೆ

ಅಮ್ಮ ನಿನ್ನ ತೋಳಲ್ಲಿ
ಮತ್ತೊಮ್ಮೆ ತೊನೆಯುತ್ತಾ
ಕೂರೋ ಆಸೆ
ಕಾಟವ ಸಹಿಸದೇ
ಹುಸಿ ಪೆಟ್ಟು ಕೊಟ್ಟಿರಲು
ಸುಮ್ಮನೇ ಸಿಟ್ಟನ್ನು
ಮಾಡೋ ಆಸೆ

ಅಮ್ಮ ನೀ ಕೈ ಹಿಡಿದು ನಡೆದರೂ
ನಾ ತಪ್ಪಿಸಿ ಹೋಗಿ
ಬೀಳೋ ಆಸೆ
ನೋವೇನೂ ಆಗದಿದ್ದರೂ
ನಿನ ಕಂಡು ಸುಮ್ಸುಮ್ನೆ ಅಳುವ ಆಸೆ
ನೀ ನನ್ನ ರಮಿಸುವುದಾ
ಕೇಳೋ ಆಸೆ

ಅಮ್ಮ ನಿನ್ನ ಕೈಯಲ್ಲಿ
ಕೈ ತುತ್ತು ತಿನ್ನೋ ಆಸೆ
ಚಂದಿರನ ತೋರಿಸುತಾ
ನೀ ತುತ್ತು ತಿನಿಸಲು
ನಾ ಹೀಗೆ ಇರುವಾಸೆ
ಮತ್ತೊಮ್ಮೆ ಮಗುವಾಗೋ ಆಸೆ!!!

.... ಪ್ರವಿ

ಕೂಡಿ ಬಂದ ಗಳಿಗೆ

ನನ್ನೆದೆ ಗೂಡಲಿ ನಿನ್ನದೇ ಚಿಲಿಪಿಲಿ
ನಿನ್ನನು ಸೇರಲು ಸುಮ್ಮನೆ ಗಲಿಬಿಲಿ
ಮನಸಿನ ತುಂಬಾ ತಣ್ಣನೆ ಕೋಲಾಹಲ
ನೋಡುವ ತವಕವೇ,ತಣಿಯದ ಕುತೂಹಲ

ಸಾವಿರ ಮಾತನು ಹೇಳಲು ಬಂದೆನು
ನಿನ್ನನು ನೋಡಲು ಮಾತನೇ ಮರೆತೆನು
ನೋಟವೇ ಹೇಳಿದೆ ನನ್ನೆದೆ ಮಾತನು
ನಿನ್ನಯ ಉತ್ತರ ಕೇಳದೇ ಹೋಗೆನು

ಜೊತೆ ಜೊತೆ ನಡೆದಿರೆ ಅದೇನೋ ರೋಮಾಂಚನ
ಕೈಗೆ ಕೈ ತಗುಲಲು ಅದೇಕೋ ತುಸು ಕಂಪನ
ಸಾವಿರ ಅರ್ಥವ ಹೇಳಿದೆ ನಡುವಿನ ಮೌನ
ಯಾವುದೂ ತಿಳಿಯದೆ ಚಡಪಡಿಸುತಿದೆ ಮನ

ಮುದ್ದಿನ ಕಣ್ಣಲಿ ಮಿಂಚಿನ ಹೊಳಪಿದೆ
ನನ್ನೀ ಪ್ರೀತಿಯ ಪ್ರಶ್ನೆಗೆ ಉತ್ತರ ಸಿಕ್ಕಿದೆ
ಕಂಡೆನು ಪ್ರೀತಿಯ ನಿನ್ನಯ ಕಣ್ಣಲೂ
ಕಾದಿರುವ ಶುಭಗಳಿಗೆ,ತೆರೆಯಿತು ಭಾಗ್ಯದ ಬಾಗಿಲು.

..............ಪ್ರವಿ