ಹೊಲಿಕೆಯೇ ಹೊಳಪು ಕುಂದಿದೆ, ನಿನ್ನ ವರ್ಣನೆಯ ಮುಂದೆ

ಕೋಲ್ಮಿಂಚು ಸಾಟಿಯೇ ?
ನಿನ್ನ ಕುಡಿನೋಟಕೆ
ಪೂರ್ಣ ಚಂದ್ರನೂ ಕಮ್ಮಿಯೇ
ನಿನ್ನ ಕಣ್ಣ ಹೊಳಪಿಗೆ

ಹಂಸವನೂ ಹಿಂದಿಕ್ಕಿತು
ಆ ನಿನ್ನ ನಡಿಗೆ
ಬಳ್ಳಿಯೂ ತಲೆಬಾಗಿತು
ನೀ ಬಳುಕುವ ಶೈಲಿಗೆ

ಕೋಗಿಲೆಯೂ ಕಂದಿತು
ಈ ನಿನ್ನ ಕಂಠಕೆ
ನವಿಲು ನಾಚಿ ನೀರಾಯಿತು
ನಿನ್ನ ಈ ನರ್ತನಕೆ

ಮಲ್ಲಿಗೆಯೂ ಮಂಕಾಯಿತು
ನಿನ್ನ ಈ ಬಣ್ಣಕೆ
ಹೋಲಿಕೆಯೇ ಹೊಳೆಯದು
ನಿನ್ನಯ ಸದ್ಗುಣಕೆ

ಸಮಸ್ತ ಭಾರತೀಯರಿಗೆ ಸ್ವತಂತ್ರೋತ್ಸವದ ಶುಭಾಶಯ

ಸರ್ವತಂತ್ರ ಸ್ವತಂತ್ರ ತಂದ ಸ್ವಾತಂತ್ರ
ಮಾಡಬೇಡಿ ಇದನು ಅತಂತ್ರ
ಪ್ರೀತಿ,ಸ್ನೇಹ,ಸಹಬಾಳ್ವೆ ಆಗಿರಲಿ ನಮ್ಮ ಮಂತ್ರ
ಕದಡದಿರಿ ಶಾಂತಿ ಕೊಳವ,ಮಾಡಿ ಕುತಂತ್ರ

ಆದರೆ ಸುಮ್ಮನಿರಬೇಡಿ ಹರಿಯುತಿರೆ
ಭಾರತೀಯರ ನೆತ್ತರ
ಜೀವ ತೆಗೆಯುತಿರೆ ಸುಮ್ಮನಿರೋ ಹೇಡಿ ನಾವಲ್ಲ
ಆಗ ಕ್ರಾಂತಿ ಅನಿವಾರ್ಯ

ಬನ್ನಿ ಗೆಳೆಯ ಗೆಳತಿಯರೆ ಕೂಡಿ ಆಚರಿಸುವ
ಅರವತ್ತೆರಡರ ಈ ಸ್ವತಂತ್ರೋತ್ಸವ
ದೇಶಕ್ಕಾಗಿ ದುಡಿವ ದೇಶಕ್ಕಾಗಿ ಮಡಿವ
ಭಾರತವ ರಕ್ಷಿಸುವೆನೆಂಬ ಪಣವ ತೊಡುವ

ಸಮಸ್ತ ಭಾರತೀಯರಿಗೆ ಸ್ವತಂತ್ರೋತ್ಸವದ ಶುಭಾಶಯ.

ನನ್ನೆಲ್ಲ ಗೆಳೆಯ ಗೆಳತಿಯರಿಗೆ

ಜೀವಕ್ಕೆ ಜೀವ ಕೊಡೋ ಗೆಳೆಯ
ಜೊತೆಯಲಿ ನೀನಿರೆ ನನಗೆಲ್ಲಿ ಭಯ
ಹೆದರಲಾರೆ ಈಗ ಆದರೂ ಪ್ರಳಯ
ನಿನಗಿದೋ ಸ್ನೇಹ ದಿನದ ಶುಭಾಶಯ

ಎಂದೆಂದೂ ಜೊತೆಯಿರುವ ಗೆಳತಿ
ನನಗಿಲ್ಲ ಇನ್ನೆಂದೂ ಭೀತಿ
ಹೀಗೆ ಇರಲಿ ನಮ್ಮ ಮೈತ್ರಿ
ಸ್ನೇಹ ದಿನದ ಶುಭಾಶಯ, ಜೊತೆಯಿದೆ ಒಂಚೂರು ಪ್ರೀತಿ

---------------------------ಸ್ನೇಹದಿಂದ ಪ್ರವಿ

ಮರೆಯಲಾಗುವುದೇ ಉಸಿರು !!

ಮನದ ಹಾಳೆಯ ತುಂಬಾ ನೀನಿಟ್ಟ ಹೆಜ್ಜೆಯ ಗುರುತು
ತೊರೆದು ಹೋಗದಿರು ನನ್ನ ನೀ ಮರೆತು
ನಾನೇನನೂ ಅರಿಯೆ ನಿನ್ನ ಪ್ರೀತಿಯ ಹೊರೆತು
ಬಾಳು ನನ್ನೊಂದಿಗೆ ನನ್ನ ಪ್ರೀತಿಯ ಅರಿತು

ಜೊತೆಯಲಿ ನೀನಿರೆ , ಎಂಥ ಹಿತ ಈ ಇರುಳು
ಮನದ ಮೇಲೆಲ್ಲಾ ಚುಕ್ಕೆಯ ಸಾಲು
ಎದೆಯ ಬಾಂದಳದ ತುಂಬಾ ಪ್ರೀತಿಯ ಬೆಳದಿಂಗಳು
ಸುತ್ತಲು ಬೆಳಕು , ಚೆಲ್ಲಿದಂತೆ ಹಾಲು

ಪುಟದ ತುಂಬೆಲ್ಲ ಕೇವಲ ನಿನ್ನದೇ ಹೆಸರು
ಈ ನಿನ್ನ ನೆನಪುಗಳು ಸದಾ ಹಚ್ಚ ಹಸಿರು
ಯಾವುದ ಮರೆತರೂ ಮರೆಯಲಾಗುವುದೇ ಉಸಿರು
ಹಸಿರು ಉಸಿರಾಗಿ ನೀ ಎಂದೂ ನನ್ನ ಜೊತೆಯಿರು

... ಪ್ರವಿ